Qadrli talabalar, aziz professor-o‘qituvchilar va universitetimiz jamoasi!

Kuni kecha Prezident Shavkat Mirziyoyev rahbarligida o‘tkazilgan yoshlar bilan ochiq muloqot barchamiz uchun ulkan ishonch va yangi imkoniyatlar eshigini ochdi. Ushbu muloqot nafaqat mamlakatimiz yoshlari, balki Termiz davlat muhandislik va agrotexnologiyalar universiteti jamoasi uchun ham yangi mas’uliyat va yuksak marralar sari dadil qadam demakdir.

Prezidentimiz ta’kidlaganidek, yurtimizda 22 milliondan ziyod yoshlar ulkan iqtisodiy, ijtimoiy va siyosiy kuch hisoblanadi. Bu kuch — ilmli, tashabbuskor, zamonaviy fikrlaydigan va mas’uliyatli avloddir. Biz esa aynan ana shunday yoshlarni tarbiyalayotgan oliy ta’lim muassasasimiz.

Aziz talabalar!

Sizlar bugun oddiy talabalar emassiz. Sizlar — ertangi muhandislar, agrotexnologlar, innovatsiya yaratuvchilari, tadbirkorlar va yangi ish o‘rinlari yaratuvchi yetakchilardirsiz. Davlatimiz tomonidan yoshlar tadbirkorligi, startaplar va innovatsion g‘oyalar uchun ajratilayotgan ulkan mablag‘lar — sizlarga bo‘lgan katta ishonch ifodasidir.

Endi eng muhim savol: biz bu imkoniyatlardan qay darajada samarali foydalanayapmiz?

Universitetimizda har bir fakultet, har bir kafedra, har bir laboratoriya — g‘oya tug‘iladigan, loyiha yaratiladigan, startap shakllanadigan innovatsion muhitga aylanishi shart. Bugun muhandislik va agrotexnologiya sohalarida innovatsiya — tanlov emas, balki zamon talabi.
Hurmatli professor-o‘qituvchilar!

Sizlar faqat bilim beruvchi emassiz. Sizlar — ilhom manbai, yo‘l ko‘rsatuvchi va yoshlar qalbida ishonch uyg‘otuvchi ustozlarsiz. Yoshlarni g‘oyadan tayyor biznesgacha yetaklaydigan samarali tizimni shakllantirishda universitet ustozlarining o‘rni beqiyos.

Talabalarga nafaqat nazariy bilim, balki amaliy ko‘nikma, tadbirkorlik tafakkuri, jamoada ishlash madaniyati va global fikrlash qobiliyatini berish — bizning asosiy vazifamizdir.
Har bir diplom ishi — real muammoni hal qiluvchi loyihaga aylansin.
Har bir ilmiy tadqiqot — ishlab chiqarish bilan uzviy bog‘lansin.
Aziz yoshlar!

Bugun dunyo tez o‘zgar­moqda. Raqobat kuchaymoqda. Biroq imkoniyatlar ham mislsiz darajada kengaymoqda. Kreditlar, grantlar, startap dasturlari, xorijiy tajriba almashinuvi — bularning barchasi sizlar uchun yaratilgan.

Qo‘rqmang. Tavakkal qiling. G‘oya bildiring. Loyihalaringizni himoya qiling.
Xatodan emas, harakatsizlikdan qo‘rqing.

Universitet rahbariyati sifatida biz:

— yoshlar startaplarini qo‘llab-quvvatlash markazi faoliyatini yanada kuchaytirish,
— ilmiy ishlanmalarni tijoratlashtirishga ko‘maklashish,
— ishlab chiqarish korxonalari bilan hamkorlikni kengaytirish,
— xorijiy til va raqamli ko‘nikmalarni rivojlantirish bo‘yicha qo‘shimcha dasturlar joriy etish bo‘yicha aniq va tizimli chora-tadbirlarni amalga oshiramiz.

Bizning maqsadimiz — oddiy diplom sohibini emas, balki ish o‘rni yaratadigan, innovatsiya kiritadigan va jamiyat taraqqiyotiga hissa qo‘sha oladigan mutaxassisni tayyorlashdir.
Qadrli jamoa!

Surxondaryo zamini azaldan ilm, jasorat va ma’rifat maskani bo‘lib kelgan. Biz ushbu an’anani zamonaviy texnologiyalar, innovatsion yondashuv va kuchli jamoaviy ruh bilan davom ettirishimiz lozim.

Keling, bugundan boshlab har birimiz oldimizga aniq va yuksak maqsad qo‘yaylik:
— har bir talaba — kamida bitta innovatsion g‘oya bilan,
— har bir kafedra — kamida bitta amaliy loyiha bilan,
— har bir fakultet — kamida bitta muvaffaqiyatli startap bilan faxrlansin.

Ishonamanki, birgalikda harakat qilsak, universitetimizni nafaqat viloyat, balki respublika va xalqaro miqyosda ham yetakchi ta’lim va innovatsiya markaziga aylantiramiz.

Rasul TOʻRAYEV,
Termiz davlat muhandislik va agrotexnologiyalar universiteti rektori