Universitetda ilmiy tadqiqotlar, innovatsion ishlanmalar va amaliy ta’limni rivojlantirishga xizmat qiluvchi zamonaviy ilmiy infratuzilma shakllantirilgan. Bugungi kunda Termiz davlat muhandislik va agrotexnologiyalar universitetida jami 48 ta zamonaviy laboratoriya, 1 ta robototexnika xonasi, 1 ta o‘quv-amaliy ustaxona hamda 1 ta tikuvchilik xonasi faoliyat yuritmoqda. Mazkur laboratoriyalar va amaliy o‘quv maydonchalari universitetning muhandislik, energetika, agrotexnologiyalar, qurilish, konchilik, veterinariya, iqtisodiyot va axborot texnologiyalari yo‘nalishlari bo‘yicha ta’lim hamda ilmiy tadqiqot jarayonlarini zamonaviy usullar asosida tashkil etishda muhim o‘rin tutadi.
Universitetning Asosiy o‘quv binosida 13 ta zamonaviy laboratoriya va 1 ta tikuvchilik xonasi mavjud bo‘lib, ularda talabalar nazariy bilimlarini amaliy mashg‘ulotlar bilan mustahkamlaydi hamda ilmiy izlanishlar olib boradi. Mexanika va konchilik ishi fakulteti universitetning eng yirik ilmiy-amaliy bazalaridan biri bo‘lib, unda 25 ta zamonaviy laboratoriya, 1 ta robototexnika xonasi va 1 ta o‘quv-amaliy ustaxona faoliyat yuritadi. Ushbu infratuzilma talabalar va yosh tadqiqotchilarga zamonaviy ishlab chiqarish texnologiyalari, avtomatlashtirilgan boshqaruv tizimlari, robototexnika va sanoat uskunalari bilan ishlash bo‘yicha amaliy tajriba orttirish imkonini yaratadi.
Iqtisodiyot, o‘rmonchilik va veterinariya fakulteti binosida 2 ta maxsus laboratoriya tashkil etilgan bo‘lib, ularda veterinariya, biologiya va iqtisodiyot yo‘nalishlari bo‘yicha ilmiy-amaliy tadqiqotlar olib boriladi. Agrobiologiya fakulteti binosida esa 8 ta zamonaviy laboratoriya faoliyat ko‘rsatib, qishloq xo‘jaligi, agronomiya, seleksiya, tuproqshunoslik, o‘simliklarni himoya qilish va ekologiya yo‘nalishlarida innovatsion tadqiqotlar amalga oshiriladi.
Barcha laboratoriyalar zamonaviy o‘lchov uskunalari, raqamli texnologiyalar, ilmiy-tadqiqot jihozlari va amaliy tajriba vositalari bilan bosqichma-bosqich jihozlanib bormoqda. Professor-o‘qituvchilar, doktorantlar, mustaqil izlanuvchilar va talabalar ushbu laboratoriyalarda ilmiy tadqiqotlar olib borish, innovatsion ishlanmalar yaratish, tajriba-sinov ishlarini amalga oshirish hamda ishlab chiqarish korxonalari bilan hamkorlikdagi ilmiy loyihalarni bajarish imkoniyatiga ega.
Universitetning ilmiy infratuzilmasi ta’lim, fan va ishlab chiqarish integratsiyasini ta’minlashga xizmat qilmoqda. Laboratoriyalarda olingan ilmiy natijalar sanoat korxonalari, qishloq xo‘jaligi tarmoqlari va xizmat ko‘rsatish sohalariga joriy etilib, ishlab chiqarish samaradorligini oshirish, energiya va resurslardan oqilona foydalanish, yangi texnologiyalarni yaratish hamda innovatsion iqtisodiyotni rivojlantirishga munosib hissa qo‘shmoqda. Shu orqali universitet SDG 9 – «Industry, Innovation and Infrastructure» maqsadlari doirasida zamonaviy ilmiy infratuzilmani rivojlantirish, innovatsiyalarni qo‘llab-quvvatlash va ilm-fan yutuqlarini amaliyotga tatbiq etish bo‘yicha izchil faoliyat olib bormoqda.